O venres foi un bo día.

O venres pasado comezaron moitas cousas na Biblio: Para algúns foi o seu primeiro día como usuarios: eu estaba encantado de velos felices co seu carné, co seu primeiro libro para a casa, firmando no libro de visitas da Biblio...
Outros amosáronse como usuarios expertos, moi autónomos eles.
Velos a todos foi moi agradábel!


Ademais, nese día botou a andar o que será o primeiro proxecto compartido do curso: Xentes como folerpas.
Queredes saber de que vai?

Carnés novos.

Hoxe todos na escola recibimos un agasallo do Rato:

O venres a Biblio abre as súas portas ao préstamo neste curso e nós iremos alí... cun novo carné nas mans!

Foi unha sorpresa que tivemos hoxe e que gustou moito a todos. Xa estamos fervendo por usalo!!

Ademais sabemos que o Rato anda tecendo nun novo tema para traballarmos xuntos neste trimestre. Cal será? Nos expositores do vestíbulo hai xa moitos libros que comezan a darnos algunha pista.

Axiña habemos ter novas. Seguro!

Viviño...e traballando!!

OLAAA!
Pensabades que me fora para sempre? Pois non!
Xa estou aquí, de volta das vacacións e levo uns días trafegando na Biblio... e preparando algunha sorpresa para todos.
Polo de pronto, comunícovos que todo está xa listo para comezar co préstamo, así que a semana próxima...DESPEGAMOS!

Hoxe, ademais de saudarvos a todos, quero amosarvos un agasallo que tivemos: Marta, unha das miñas moitas amigas, deseñou para nós dous logotipos, un para a Biblio e outro para o colexio. Queredes velos? Pois, aí van:











Son moi bonitos, non si??
GRAZAS, Marta. A nós gústannos moito!!

Mateus marcha cara o bosque.

Amigas e amigos:
Chegou o momento do verán: teredes tempo de soñar con todo tipo de aventuras, de comprobar como brillan as torres e luces que aprendestes a amar, e, por suposto, de bailar e ler todos os libros para os que non tivérades tempo até agora.

Saúde para todos!!!

A Xosé Ballesteros.

Vaia momento o do mércores!!

Xosé Ballesteros Rei, facendo honor ao seu apelido, no Trono das palabras; unha morea de nenas, nenos e mestres pasmados e felices... e un servidor, o Rato, relambéndose de satisfacción!

Abaixo deixo unhas imaxes que queren amosar o imposible: os momentos de ledicia que Xosé nos agasallou, coa súa presenza amable e a súa inmensa mestría.
Claro que, polo que este Rato viu, el tamén disfrutou cos animais imaxinados polos maiores, o coelliño branco dos nenos do primeiro ciclo e mesmo, coas sabias recomendacións dos pequechiños sobre os libros que deben manterse sempre publicados.

GRAZAS, Xosé, por facer que o último conto do curso na Biblio, fose un dos mellores do ano.

Unha Hora do Conto moi especial

Canto disfrutei hoxe mirando desde o meu buratiño!!
Os que van ser os pequechos no curso que vén, asistiron a unha Hora do Conto pensada para eles.
Mirádeos nas imaxes, atendendo estupendamente, moi arroupados polos alumnos experimentados, que xa teñen catro anos, e participando na historia coas súas maíñas levantadas.
Sede moi benvidos, pequechos!

Escenas de festa.

Velaí momentos dos vividos o venres, na festa que puxo fin ao proxecto Aluméame.