xoves, 20 de decembro de 2018

Fran e Marina viñeron gravar!



Este domingo dende a miña casiña vin como entraban na biblioteca estes músicos, que pasaron todo o día tocando jazz e música brasileira. Marina canta, Fran toca a guitarra e Miguel toca a percusión.
Díxenlles que me gustara moito a súa música e convideinos a vir un día o cole cando esteades vos.
Deixovos unha mostra de como ensaiaban, esperamos algún día poder escoitalos e coñecelos no noso escenario.






xoves, 13 de decembro de 2018

Visita deportiva!



Ola de novo!
Onte escoitei moito ruído de balóns, collín a miña cámara e saín ver que pasaba no pavillón.
Menuda sorpresa me levei ao atoparme con algúns dos xogadores do equipo do Basquet Coruña.
Que ben o pasamos!

martes, 20 de novembro de 2018

CELEBRÁMOLO MAGOSTO!


O venres fixo un día estupendo e aproveitamos para festexar o outono e un dos seus froitos estrela, a castaña!
Ademáis de comer (moitas) castañas asadas, grazas á colaboración das familias e de Jose, as nenas e os nenos de 5º e 6º de EP organizaron uns xogos moi chulos.
Eu saín da biblio e tamén comín, xoguei e ata saquei unhas fotiños para que vexades como desfrutamos!
Pasámolo moooi ben!!








mércores, 7 de novembro de 2018

SAMAÍN!!!

E Faustino tamén gravou co seu ollo-cámara o seu día favorito. A véspera de Todos os Santos.
O Samaín no colexio celebrouse con arrepíos, medos, escalofríos... como ten que ser!
Os nenos e profes de 3º e 4º contaronnos a historia inventada por unha muller un verán que non houbo verán. A historia do monstro do profesor FRANKENSTEIN.
Despois proxectaron a película favorita destas datas para divertirse pasando un pouco de medo.
Pois como di Faustino, "Quen ten cu, ten medo"
E para rematar, cantamos a canción das tumbas.
Ata a próxima.

martes, 6 de novembro de 2018

XA TODOS DE VOLTA!

Perdoade a miña ausencia, pero é que andiven "Facendo as Américas", coñecendo outros ratiños doutro continente que teñen moito, moito que mostrarnos. Xa vos irei contando ao longo do curso...
Como sabía que a miña viaxe ía para tempo, deixei encargado ao meu amigo "Faustino Donoso" que me contara todo o que no cole sucedía, así que puxo unha cámara nun ollo e gravoume esta película.
Así poderedes ver coma mín :
Os amigos alemáns que nos visitan todos os anos, a entrega dos carnés da biblio aos nenos novos, os contos e escenificacións dos venres, as profesoras de prácticas que tanto colaboran, os nenos facendo as cabazas e os colares de zonchos e as cariñas ledas de todos e todas medrando e aprendendo felices.
Pronto teredes novas miñas e ata entón, divertídevos moito.


martes, 29 de maio de 2018

A PELÍCULA DESTE CURSO

Xa vai ahí un curso máis.
Todos os nenos e nenas son máis altos,máis guapos, máis fortes, máis sabios...
 Foi un curso de aventuras e algunha desventura. Pero de todo fomos aprendendo.
 Aquí tedes unha reportaxe fotográfica das nosas andanzas.
 Que a nosa ilusión por aprender e disfrutar continúe nos anos vindeiros.
Un saúdo familias e amigos e ata pronto.


luns, 28 de maio de 2018

martes, 6 de marzo de 2018

VENRES EN FEMININO!!






Estou abraiado e emocionado co que acontece aquí os venres. Cóntovos os meus pensamentos:
Resulta que estamos coñecendo grandes mulleres que existiron en tempos pasados  (María Pita, María Wonenburger, Emilia Pardo Bazán...), e aquí, no cole, cada venres véñennos visítar grandes mulleres que están agora mesmo vivindo moi pertiño de nós.
Mulleres que nos cantan e nos contan, que nos fan soñar coa maxia , que descubren e estudan microbios que axudan a manter a vida no noso planeta, que nos mostran o mundo da  ximnasia e a súa beleza de movementos.
Mulleres, ao fin, que fan que o mundo de todos nós, homes e mulleres, nenas e nenos, sexa un mundo mellor, con máis cancións, maxia, ciencia, deporte...
E no que todos miremos o mundo con LENTES DE COR VIOLETA

 M.J. Pérez (cantautora)
 Ángeles Cid (microbióloga, investigadora da Universidade da Coruña)
 Fani Triana (maga)
 
 Marta Bobo (profesora do INEF e medallista olímpica en ximnasia rítmica)
 Moitísimas grazas a todas elas pola súa xenerosidade, a súa amabilidade, por contarnos a súa vida de mulleres deste tempo. Estou seguro que todos neste colexio as lembraremos con moito cariño e admiración.
E ata a proxima, que parece que aínda terei que seguir falando de máis venres en feminino. 

luns, 5 de marzo de 2018

VISITAMOS A LITA

Hai unha semana o meu compañeiro MACario ( o rato do Museo de Arte Contemporáneo) envioume unha curiosa foto, na que aparecen os nenos de 5º e 6º do Cornide, sendo retratados por Lita Cabellut, a pintora aragonesa que expón a súa obra no museo. Seica estiveron por alí admirando os retratos que pinta Lita, e ó final pasaron polo seu obradoiro para ser inmortalizados por ela.
mirade que ben traballa esta muller.
Testimonio: Lita Cabellut


venres, 16 de febreiro de 2018

ENTROIDO 2.018

Aquí tedes as imaxes do noso entroido.
 Xa que estamos aprendendo moito das nosas mulleres importantes, podedes ver aos piratas aos que venceu MARÍA PITA, aos matemáticos en honor de MARIA WONENBURGER, a pintores aprendendo de MARUJA MALLO e personaxes do tempo e das historias de EMILIA PARDO BAZÁN.
Queremos agradecer tamén as deliciosas larpeiradas que as familias aportaron para que esta festa fose divertida e ademáis deliciosa.
Un bico con sabor a filloas.



luns, 22 de xaneiro de 2018

OS CONTOS NA LAREIRA

Aquí temos a sorpresa prometida .
O noso vello trono para contar contos desapareceu, e no seu lugar temos unha bonita e quentiña lareira, como  na que os nosos devanceiros pasaban as noites longas e frías entretidos con historias que se contaban uns a outros.
E, como en todas as  lareiras, hai un gato e algún que outro rato buscando a caloriña.
Para a súa inaguración viñeron Alex e Sara, da marabillosa editorial Kalandraka, e cantaron e contaron vellos e novos contos.



E aquí tedes un vídeo para disfrutar tanto coma nós.
Ata a próxima con máis novidades.

venres, 12 de xaneiro de 2018

ANO NOVO CHEO DE MAXIA

Este ano novo sei ben que vai estar cheo de maxia. Agárdannos moitas sorpresas na nosa biblioteca... Que será? Prométovos que axiña o saberedes.
 Para comezar, a profe Ana leunos o conto MAGO GOMA:

Este é o Mago Goma.
Un  mago moi singular.
Un mago que garda soños,
nunha caixa de cristal.

E despois descubrimos que no colexio temos un mago pequeno. Mellor dito:  Un  MATEMAGO.
Diego, de 2º curso, é un fenómeno facendo maxia coas matemáticas, e foi quen de sumar ringleiras de números moito máis rápido que os rapaces de 5º e 6º coas calculadoras.
Tamén é verdade que contou coa colaboración imprescindible de Sheila, que lle fixo de axudante. 
 



Nenos, profes e ata eu Rato, quedamos impresionados e esperamos escoitar moitos máis contos máxicos, e moitos nenos e nenas ensinándonos MATEMÁXICAS.
Ata a próxima.