VexetArte.

Dentro do proxecto sobre vexetais que están a desenvolver en Infantil e entre outras actividades, onte puiden contemplar estampas como as que amosan estas imaxes.
Alimentados coa imaxinación doutros, os pequechos deixaron voar a súa... e velaí o resultado.
No fin da xornada estaban tan satisfeitos que arrastraron ás súas familias para que visen o seu VexetArte.

Historia da Torre de Hércules.

Neste proxecto de Aluméame, todos no colexio temos recibido dous cadernos monográficos nos que traballlar: nun arredor da Torre de Hércules e noutro coa figura de José Cornide.
Para o primeiro, que recolle lendas, poemas e a historia do noso faro, os rapaces de 5º e 6º fixeron un traballo hai xa unhas semanas e que agora está a disposición dos seus compañeiros máis pequenos. As fontes informativas sobre a historia da Torre non son moi asequibles para nenos de curta idade, pero este texto elaborado por eles é máis sinxelo.
Ademais, os maiores fixeron unha exposición oral na que explicaron os contidos do seu traballo, servindo así eles mesmos como fonte informativa para os demais.

A Biblio ule a repolo.

Nestes días desde o meu burato estou a percibir distintos aromas na Biblio, que me obrigan a saír correndo, morto de curiosidade: uliume a moito libro novo...ummm, hainos preciosos!!

Pero onte uliume...a repolo fresquiño!!
Mirade o que atopei: todo preparado na Biblio para que en Infantil comecen cun proxecto sobre vexetais.
Unha chea de recursos... moi ben seleccionados, non si?

Pepiño, o grilo.

Pepiño, o grilo, chegou de Portugal un día de primavera no curso pasado. Viaxou desde aló no coche da profe Ana e viviu unhas semanas na aula de 1º e 2º, recibindo todos os coidados dos nenos e nenas. Agasallounos a todos os que nesta escola vivimos co seu fermoso canto, improvisado a calquera hora do día...e sen ter en conta a actividade que estabamos a realizar. Non nos importaba: encantábanos escoitalo.
No mes de xuño, tras comprender que por moito agarimo e vexetal que lle deramos, a gaiola e a escola non eran lugar para el, os nenos ceibárono no campo, despedídoo co son de Ai Pepiño, adiós.

Hoxe, despois dun ano, Pepiño volveu a visitarnos. Apareceu na súa gaioliña e na mesma aula. Os pequenos recoñecérono ao momento: é Pepiño, é Pepiño!!

Prometemos coidarte, Pepiño, xa que volviches a visitarnos. Prometemos tamén, volverte a ceibar.

Coa luz de catro sentidos.

Nestas semanas en que tanto levamos aprendido sobre luces, non podemos esquecer ás persoas que se ven privadas da vista e alumean a súa vida coa forza doutros sentidos.
Pensando nelas, limos estes dous fermosos libros e, na aula de 5º e 6º, estamos a traballar cun deles, que comeza así: Para Tomás, el color amarillo sabe a mostaza, pero es suave como las plumas de los pollitos.
Hoxe amosamos o que van ser algunhas páxinas de... O noso libro negro das cores
E a ti? a que che sabe a cor verde? como ule a cor azul?