luns, 26 de novembro de 2012

ESCOLMA DE POEMAS PARA VESTIRSE

A min gústame moito a poesía. E ademáis sei moitos poemas.
 Sei poemas de animais, poemas do mar, poemas de amor, poemas de tristuras, poemas de burlas..., pois aquí tedes unha escolma de poemas para vestirnos.

 Hai folcklore infantil, adiviñas,  cancións populares e poemas de grandes escritores como Alberti,Neruda, Manuel María, Gloria Fuertes, Robert Louis Stevenson, Mª Elena Walsh, Gloria Sánchez, Antón Cortizas, Mª Cristina Ramos, Ana Mª Fernández, Álvaro Cunqueiro...

 ¿Seredes quen de aprendervos algún?
Mirade neste caixon de xastre e escollede.

xoves, 22 de novembro de 2012

EXPOSICIÓN


Coa colaboración de pais, nais,amigos e os nenos e nenas do colexio, xuntamos traxes, utensilios, patróns e outros obxectos que se relacionan co mundo do traxe.

Quedounos unha exposición moi lucida, onde podemos ver desde unha coroza ,ata unha máquina de coser SINGER de principios do século pasado.

                                                                                                                                Tamén temos un traxe tradicional de muller galega, un costureiro

 tesoiras de xastre, o ripo de cardar a la,
 alfineteiros e un cestiño cun  labor de calceta.
Así que tedes unha fermosa exposición, e o noso cole transformouse nun museo do vestido, para aprender e disfrutar moito máis deste proxecto de traballo.

luns, 19 de novembro de 2012

HISTORIA DO VESTIDO

Andiven pescudando información sobre como foi o vestido a través dos tempos, e aquí tedes o resultado do meu traballo:
 Cos meus amigos, os ratos de biblioteca, xuntei todos estes libros que tedes na entrada do cole.
 Cos meus amigos os ratos de ordenador, busquei estes vídeos que ilustran este tema:




 E máis esta páxina en internet que da moitísimos detalles da roupa en cada época da historia.
Espero que vos gusten.

xoves, 8 de novembro de 2012

MEDO!!!

O Samaín vaise achegando, e a actividade no cole é frenética. Todo o mundo está mans á obra, facendo cabazas monstruosas.

E as cabazas baleiras tomaron vida no escenario...

Todos entraron para pasar unha sesión de medo, coa música tenebrosa e coas imaxes arrepiantes...

Pero non tiveron medo, porque... para monstruos....

mércores, 7 de novembro de 2012

CON ZAPATO BAIXO...

Estes días ,cavilando na miña casiña, agora que ven o frío,decateime do importante que é ter unha boa roupa. E que pode ser moi interesante coñecer algo máis do mundo do vestido, a súa historia, cómo se fai a roupa, cómo se visten nos distintos lugares do mundo, os traxes nas distintas épocas da humanidade...

E isto é o que vos propoño como tema de investigación, para que traballedes e coñezades moitas cousas desta faceta tan importante nas nosas vidas.
Así que collín os caderniños, metínos na caixa dos regalos, e as profes Ana e Marisol explicaron aos nenos o meu proxecto. Xa estamos en marcha, espero que estes nenos vistan moi ben o caderniño co seu traballo e a súa imaxinación, adiante pois!!!

luns, 15 de outubro de 2012

GRÜFFELO, GRUFFALO, GRÚFALO


Hoxe, día 11 de outubro, fixemoslle a despedida a Sara, a nosa estudante italo-alemana, que estivo connosco durante este mes.  Ela fíxonos un regalo: o libro DER GRÜFELO . Así que o noso conto de hoxe foi en alemán, inglés e castelán. Sara, e as profes Asun e Ana leron a historia deste personaxe famoso por ser feo, aterrador e máis inofensivo que un pequeno ratiño.
Aproveito para saudar á miña amiga Sara Buedo (que me escribe con frecuencia neste blog) e aos seus compañeiros que,  hai tempo, fixeron unha representación do Grúffalo memorable. A todos eles dicirlles que teñan moi boa sorte na nova etapa do instituto e que este sempre será o seu colexio.

luns, 8 de outubro de 2012

DE MOCHILAS E TOUPIÑAS

O venres 5 de outubro, os nenos de infantil recibiron un regalo meu, para que leven con moito cuidadiño, os libros que escollen na biblio. Son unhas mochilas azuis co seu nome, para ir cargadas de palabras, contos, poemas e cancións que as súas familias lles van descubrir.

Despois, aproveitando que a nosa amiga Sara, que sabe moitos idiomas, está pasando uns días connosco, fixemos unha lectura especial dun dos contos que máis nos gusta. Trátase dunha toupiña que quería saber quen lle fixera "aquilo" na cabeza.
Sara, en italiano, e a profe Ana en galego, léronos o conto e todos puidemos descubrir que cada idioma ten a súa propia música.


BULE BULE NA ESCOLA

Xa sabedes que por aquí ando, silandeiro, invisible, agochado sempre por entre as fendechas das paredes. Pero non deixo nunca de espiar e marabillarme do moito que queren aprender e investigar estes nenos, desde os cativicos ata os grandechos.
                                                                                                                                                                                      
As terras e os mares do noso mundo

         
Facendo a escolla dos libros
1º ciclo en Vioño camiño da biblioteca
Os de 1º ciclo fixeron a súa primeira saída mensual á biblioteca da Sagrada Familia para coller libros e disfrutalos na hora de ler.
Os de 2º ciclo están estudando os ósos do noso axudante Faustino e os músculos coa colaboración de Lois.

 Xa seguirei informando de todo o que vaia acontecendo neste cole tan dinámico. Ata a próxima, compañeiros.

DORES TEMBRÁS E O PEIZOQUE ROQUE

Como sabedes, eu, o Rato, teño un bo amigo que colabora comigo neste blog, o trasno Mateus. Foi grazas á súa amizade coa escritora e poeta Dores Tembrás polo que ela veu o xoves ao cole para presentarnos ao peizoque Roque.

               
 O peizoque pescuda palabras polo bosque, palabras con sabores, que recenden, iluminan, abrigan... palabras que nos fixeron pasar un rato máxico por mor da nosa nova amiga.
 Dores ten o seu blog, e ela tamén escribiu da súa visita ao cole, quedou abraiada e contentísima de coñecer estes nenos.Aquí vos deixo o enlace para pinchar e ver o que nos conta desde o seu blog.

luns, 24 de setembro de 2012

XA ESTAMOS TODOS DE VOLTA!


Xa estamos todos xuntos aquí con moita alegría e gañas de aprender neste novo curso que comeza.
 Temos novos compañeiros no cole: Mikel, Oier, Elena Caridad, Elena Castro, Zoe García, Zoe Iglesias, Antón, Miguel, Ericsson, Alex, Cosmina e Desi. A todos eles..... BENVIDOS!!
Así que, o primeiro é facelos socios desta nosa biblioteca, para que poidan disfrutala. Tamén lles deixei ver a entrada da miña casa na parede, e escoitarme grazas á campaíña.
Aquí os vedes recibindo o carné que fixen para eles.

       

Despois do recreo, a profe Marisol leunos o conto dun gato pillabán e comellón, que por querer cear seis veces cada día, e enganar aos seus amos, tivo que acabar indo ao veterinario...seis veces!


Espero que o pasemos moi ben este curso, que fagamos moitas actividades divertidas, e que me escribades moitas cousas neste blog.
   ATA MOI PRONTO!
                                                         

 

venres, 22 de xuño de 2012

Amigas e amigos:
Remata xa este curso, mais non as gañas de seguir disfrutando durante este looooooooooooongo verán que agarda. Eu estarei no bosque traballando e trebellando. O amigo Rato seguramente irá á praia e fará excursións ben divertidas para buscar saberes que compartirá convosco o curso que ven, aló por setembro. E... vós? Supoño que estaredes xogando e repasando o que aprendestes no cole estes meses, e estirando os días como un enorme arco da vella desde a mañá ata a noite. E, por suposto, non deixedes de botar un ollo aos Xogos Olímpicos, non vaia ser que apareza por alí Pepiño, como xa ten pasado outras veces. E non esquezades soñar sempre cos ollos abertos: así facían xenios e xenias como Maruja Mallo. E, por suposto, nunca deixedes de cantar e bailar!!!!!!!

luns, 11 de xuño de 2012

PEQUENOS SI... PERO GRANDES LECTORES!

Venres, 8 de xuño, grande expectación no colexio. Eu, o voso amigo Rato,  decateime de que xa houbera moitos adultos lendo para nós, asi que para rematar os contos compartidos dos venres, tiñan que ler os que máis usan e disfrutan da biblioteca, os pícaros, os cativos, os nenos, vós.

Noemí de 1º, Laura de 2º, Alba de 3º, Lucía de 4º, Sergio de 5º e Sara de 6º, escolleron os seus contos máis queridos e subiron ao escenario para lelos con todo o seu sentimento, e como homenaxe a este curso que xa remata.

E a verdade é que non sabería dicir cal deles me marabillou máis.